کاہنہ(نامہ نگار) تھانہ نشتر کالونی چوکی کاچھا سبزی منڈی نے 3 رکنی موٹرسائیکل چور گینگ کو واردات کی منصوبہ بندی کرتے گرفتار کر لیا ‘ ملزمان میں گینگ کا سرغنہ قاسم عرف بہادر،امان اور عبدالرحمن شامل ہیں ۔ گرفتار ملزمان کے قبضے سے 4موٹرسائیکلیں 2 موبائل فون،نقدی اور ناجائز اسلحہ برآمد کر کے مقدمہ درج کر لیا گیا ہے۔
ملزمان ریکی کر کے بغیر لاک کے کھڑی موٹرسائیکل کو ٹارگٹ کرتے تھے۔ ملزمان نے دوران تفتیش لاہور کے مختلف علاقوں میں متعدد وارداتوں کا بھی انکشاف کیا ہے۔
وزیر اعلیٰ کا شیخوپورہ ‘گوجرانوالہ دو رویہ سڑک مکمل نہ ہونے پر نوٹس
فیروزوالہ (نامہ نگار) وزیراعلیٰ پنجاب چوہدری پرویز الہٰی نے شیخوپورہ اور گوجرانوالہ کے درمیان دو رویہ سڑک کی تعمیر کا کام بروقت مکمل نہ ہونے کا نوٹس لے کر محکمہ سی اینڈ ڈبلیو کے اعلیٰ حکام سے رپورٹ طلب کر لی ۔ محکمہ شاہرات میں کمیشن کی شرح میں ایک تا دو فیصد اضافہ ہوجانے کے باعث اس اہم سڑک کی تعمیر کاکام منصوبہ کے مطابق بروقت مکمل نہ ہوسکا ہے۔ یہ سڑک پبلک پرائیویٹ پارٹنرشپ موڈ کے تحت بن رہی ہے دریں اثناءمحکمہ ہائی وے کے ذرائع نے بتایا کہ اس سڑک کی تعمیر کےلئے ایکوائر کی جانے والی زمینوں کے دو تین مالکان نے حکم امتناعی حاصل کیا ہوا تھا اور ان زمینوں کا قبضہ نہ مل رہا تھا اب حکم امتناعی ختم ہو جانے کے بعد ضلع انتظامیہ کی مدد مانگ لی گئی ہے جس کے بعد سڑک کی تعمیر کاکام تیز ہوجائےگا۔
