ٹریفک حادثات، میاں بیوی اور کار ڈرائیور وہاڑی، 2 خواتین سمیت 4 افراد بہاولپور میں جاں بحق

وہاڑی؍ بہاولپور (این این آئی) ٹریفک حادثات  میں میاں بیوی سمیت 7 افراد جاں بحق ہو گئے۔ تفصیلات کے مطابق لڈن سبزی منڈی کے قریب ڈرائیور کو نیند آنے کے باعث تیز رفتار کار بے قابو ہو کر دکانوں سے ٹکرا گئی۔ جس کے نتیجہ میں حاصل پور کے رہائشی محمد ایوب، اس کی بیوی ناہید اور قریبی عزیز کار ڈرائیور محمد عمر موقع پر دم توڑ گئے۔ واقعہ میں ان کی 25 سالہ بیٹی علیزہ شدید زخمی ہوگئی۔ تینوں لاشوں کو ٹی ایچ کیو ہسپتال حاصل پور جبکہ زخمی خاتون کو ڈی ایچ کیو ہسپتال وہاڑی منتقل کردیا گیا۔ حادثہ کا شکار ہونے والی فیملی لاہور سے حاصل پور واپس گھر جا رہی تھی۔ دریں اثناء بہاولپور میں قومی شاہراہ پر 2 موٹر سائیکلیں ٹکرانے کے بعد ٹریلر کے نیچے آگئیں۔ ریسکیو ذرائع کے مطابق حادثے میں 2 خواتین سمیت 4 افراد جاں بحق ہو گئے۔ ذرائع کا کہنا ہے کہ حادثے میں ایک خاتون زخمی بھی ہوئی۔  لاشوں اور زخمی خاتون کو بہاول وکٹوریہ ہسپتال منتقل کر دیا گیا ہے۔