اسلام آباد (نمائندہ خصوصی) صدر مملکت آصف علی زرداری نے شنگھائی تعاون تنظیم (ایس سی او) کے سربراہی اجلاس میں شرکت کے لیے آنے والے ترکمانستان کے وزیرخارجہ اور کابینہ کے ڈپٹی چیئرمین راشد میردوف سے ملاقات کے دوران دونوں ملکوں کے درمیان اقتصادی تعاون اور کاروباری تعلقات بڑھانے کی ضرورت پر زور دیا۔ صدر مملکت آصف علی زرداری کی ترکمانستان کی کابینہ کے ڈپٹی چیئرمین اور وزیر خارجہ راشد میردوف سے ملاقات ہوئی۔ اعلامیے میں کہا گیا کہ صدر مملکت نے پاکستان اور ترکمانستان کے درمیان اقتصادی تعاون اور کاروباری تعلقات بڑھانے کی ضرورت پر زور دیا اور کہا کہ دونوں ملکوں کے مابین اقتصادی تعاون بہتر بنانے کے لیے دونوں ملکوں کی سٹاک ایکسچینج کے درمیان روابط بڑھانا ہوں گے۔ انہوں نے کہا کہ پاکستان ترکمانستان کے ساتھ اپنے تعلقات کو بہت اہمیت دیتا ہے۔ پاک-ترکمان تعلقات مشترکہ اقدار، مذہب اور ثقافت پر مبنی ہیں۔ خطے میں مشترکہ خوش حالی، استحکام اور دونوں ممالک کے عوام کی بہتری کے لیے مل کر کام کرنے کی ضرورت ہے۔ صدر مملکت نے تاپی گیس پائپ لائن منصوبے کی جلد تکمیل کے لیے پاکستان کے عزم کا اعادہ کیا اور کہا کہ تاپی گیس پائپ لائن منصوبہ دونوں ملکوں کی اقتصادی ترقی میں مفید ثابت ہوگا۔ ترکمانستان کے وزیر خارجہ راشد میردوف نے اشک آباد میں مخدوم گلی فراغی کے 300 ویں یوم پیدائش کے موقع پر بین الاقوامی فورم میں شرکت پر صدر مملکت کا شکریہ ادا کیا۔ اس موقع پر راشد میردوف نے ترکمانستان کے صدر اور ترکمان عوام کے قومی رہنما کا صدر آصف علی زرداری کے لیے خصوصی تہنیتی پیغام بھی پہنچایا۔