اسلام آباد: صدر مملکت آصف علی زرداری نے پاکستان اور ترکمانستان کے درمیان اقتصادی تعاون اور کاروباری تعلقات بڑھانے کی ضرورت پر زور دیا ہے۔صدر مملکت آصف علی زرداری نے ترکمانستان کی کابینہ کے ڈپٹی چیئرمین اور وزیر خارجہ راشد میردوف سے ملاقات کی اور اس دوران پاکستان اور ترکمانستان کے درمیان اقتصادی تعاون اور کاروباری تعلقات بڑھانے کی ضرورت پر زور دیا۔صدر مملکت نے کہا کہ دونوں ممالک کے مابین اقتصادی تعاون بہتر بنانے کے لئے دونوں ممالک کی اسٹاک ایکسچینج کے درمیان روابط بڑھانا ہوں گے. پاکستان ترکمانستان کے ساتھ اپنے تعلقات کو بہت اہمیت دیتا ہے۔ان کا کہنا تھا کہ پاک ترکمان تعلقات مشترکہ اقدار، مذہب اور ثقافت پر مبنی ہیں، خطے میں مشترکہ خوشحالی ،استحکام اور دونوں ممالک کی عوام کی بہتری کے لئے مل کر کام کرنے کی ضرورت ہے۔
صدر مملکت نے تاپی گیس پائپ لائن منصوبے کی جلد تکمیل کے لیے پاکستان کے عزم کا اعادہ کرتے ہوئے کہا کہ تاپی گیس پائپ لائن منصوبہ دونوں ممالک کی اقتصادی ترقی میں مفید ثابت ہوگا۔ راشد میردوف نے عَشق آباد میں مخدوم گلی فراغی کے 300ویں یوم پیدائش کے موقع پر بین الاقوامی فورم میں شرکت پر صدر مملکت کا شکریہ ادا کیا۔آصف علی زرداری نے مزید کہا کہ صدر پاکستان کی عَشق آباد میں بین الاقوامی فورم میں شرکت ترکمان عوام کے لئے احترام کی عکاس ہے۔راشد میردوف نے ترکمانستان کے صدر اور ترکمان عوام کے قومی رہنما کا صدر آصف علی زرداری کیلئے خصوصی تہنیتی پیغام بھی پہنچایا۔صدر مملکت نے شنگھائی تعاون تنظیم کے رکن ممالک کی حکومتوں کے سربراہان کی کونسل کے 23 ویں اجلاس میں شرکت پر راشد میردوف کا شکریہ ادا کیا۔
علاوہ ازیں صدر مملکت نے عَشق آباد دورے کے دوران پرتپاک مہمان نوازی پر ترکمانستان کی حکومت شکریہ ادا کیا۔
