لاہور(اسپورٹس رپورٹر)بھارتی اینکر نکھل ناز قومی ٹیم کے بیٹر شان مسعود کے گرویدہ ہوگئے اور دیگر ساتھی اینکرز کو بھی پاکستانی بیٹر کے تجزیے سننے کا مشورہ دے ڈالا۔ وکرانت گپتا کا کہنا تھا کہ میں نے ایشیا کپ کے دوران محمد حفیظ کو بڑے دھیان سے سنا، وہ ایک سمجھدار کھلاڑی ہیں جنہوں نے پاکستان اور بھارت دونوں کیلئے سچ بولا، میں ان کو سننا چاہتا ہو ں،جس پر نکھل ناز کا کہنا تھا کہ اگر آپ کو پاکستانی تجزیہ کار پسند ہیں تو آپ شان مسعود کو لازمی سنیے، وہ ٹیم کے باہر نہیں بلکہ اندر بیٹھے ہیں کیونکہ وہ اس وقت ٹی ٹونٹی ورلڈ کپ سکواڈ کےلئے ٹیم میں شامل ہوگئے ہیں، اگر آپ نے ان کے تجزیے سن لیے تو آپ بھی ان کے مداح ہو جائیں گے، میں نے شان مسعود سمیت کئی لوگوں کے ساتھ کام کیا لیکن شان مسعود کی انگلش بہت اچھی ہے، ان کی معلومات بہت زیادہ ہے، ان کو دنیا کی ہر لیگ کا پتا ہے، کس لیگ کا کھلاڑی کب کہاں اور کیسے کھیلا؟ میں ان کا فین ہوں، پہلے ان کے سٹرائک ریٹ کے حوالے سے مسئلہ تھا لیکن اب انھوں نے وہ بھی ٹھیک کر لیا ہے، میں ان کی کچھ ویڈیوز بھی آپ کے ساتھ شیئر کروں گا آپ ان کے تجزیے سن کر ان کے مداح ہو جائیں گے کیونکہ وہ ایک بہترین کھلاڑی ہیں۔