لاہور (خصوصی نامہ نگار)نائب امیر جماعت اسلامی لیاقت بلوچ نے منصورہ میں سیاسی مشاورتی نشست اور وفود سے ملاقات کرتے کہا کہ خاتم الانبیاء حضرت محمد ؐ  کی ولادت باسعادت انسانوں کیلئے اللہ کی رحمت کا عظیم تحفہ اور احسانِ عظیم ہے۔ ربیع الاول کی خوشیوں کی بہار نے دْنیا کو ضلالت سے نجات دِلائی۔. بعثتِ نبوی ؐ کا پیغام ہے کہ اہلِ ایمان کی آنکھیں، روح، کان، زبان، شرم گاہیں محفوظ ہوں۔آج بھی اہلِ ایمان اسی راہِ حق پر چل کر عظمت پاسکتے ہیں۔لیاقت بلوچ نے کہا کہ حکومت شہباز شریف کی سربراہی میں  حکومت عدلیہ کو تابع فرمان بنانے کیلئے غیر جمہوری غیر آئینی کھیل بند کرے۔ مولانا فضل الرحمن  حکومت اور اپوزیشن کیساتھ  سیاسی پتے کھیل رہے ہیں، ابھی تک انکا ترپ پتہ ظاہر نہیں ہوا۔انہوں نے کہاحکومت عوام کو بجلی بلوں، آئی پی پیز کے ظلم سے نجات دلانے کیلئے سنجیدہ کام کرے ورنہ انجینئرڈ سیاسی بحران کے پیچھے حکومت کو چْھپنے نہیں دیا جائے گا۔ صحافیوں کے سوالات کے جواب میں کہا کہ جماعت اسلامی تمام طبقات سے پر رابطے کررہی ہے۔