تاندلیانوالہ (نمائندہ نوائے وقت) تاندلیانوالہ تھانہ گڑھ کے نواحی علاقہ کلیانوالہ میں 5 قبروں سے باقیات نکالنے کا بڑا انکشاف سامنے آیا ہے۔ مکروہ دھندے میں ملوث بدبخت گروہ نے قبر سے مردے کی باقیات نکال لیں۔ اہل علاقہ نے اپنی مدد آپ کے تحت قبروں کو دوبارہ بند کر دیا۔ واقعہ پر گائوں میں شدید غم و غصے کی لہر پیدا ہو گئی اور خبر پورے علاقے میں جنگل میں آگ کی طرح پھیل گئی اور لوگ اپنے پیاروں کی قبروں کی حالت دیکھنے کیلئے قبرستان پہنچ گئے۔ یہ تاریخی لحاظ سے پنجاب کا سب سے بڑا اور پاکستان کا دوسرا بڑا قبرستان ہے جہاں ہزاروں کی تعداد میں قبریں ہیں۔ عوامی سماجی حلقوں نے شدید تحفظات کا اظہار کرتے ہوئے اسے ناقابل معافی جرم قرار دیا ہے اور مطالبہ کیا ہے کہ ایسے گھنائونے فعل میں ملوث گروہ کو بے نقاب کرکے قرار واقعی سزا دی جائے۔ اطلاع پر تاندلیانوالہ تھانہ گڑھ پولیس نے تحقیقات کا آغاز کر دیا ہے ۔