لاہور(سپورٹس رپورٹر)رمضان کپ فلڈ لائٹ فٹبال ٹورنامنٹ کے سیمی فائنل میں شائقین کے درمیان ہونے والے جھگڑے نے میچ کا مزا کرکرا کردیا۔کراچی میں کھیلے جانے والے پہلے سیمی فائنل میچ کے دوران شائقین گتھم گتھا ہوگئے، جھگڑا دو گروپس کے درمیان اس وقت ہوا جب مدھو محمڈن فٹبال کلب کو شاہد میموریل کلب کیخلاف ایک گول کی برتری حاصل تھی۔کھیل کے دوسرے ہاف میں سنسنی خیز میچ جاری تھا دیکھتے ہی دیکھتے تماشائی گراونڈ کے اندر داخل ہوئے جنہیں منتشر کرنے کیلئے سکیورٹی طلب کی گئی، اس دوران میچ 15 منٹ تک رکا رہا، میچ دیکھنے کیلئے شائقین کی بڑی تعداد موجود تھی۔کھیل کے آخری لمحات میں شاہد میموریل نے گول کر کے سکور برابر کردیا، میچ کو فیصلہ کن بنانے کیلئے پنالٹی ککس ہوئیں جس پر مدھو محمڈن نے کامیابی حاصل کر کے فائنل کیلئے کوالیفائی کر لیا۔