اسلام آباد(آئی این پی)پاکستان کے سابق فاسٹ بولر شعیب اختر کا ویرات کوہلی کو مشورہ دیتے ہوئے کہنا تھا کہ ان کو اپنی پرفارمنس بہتر کرنے کی ضرورت ہے ورنہ وہ  بھی نہیں بخشے جائیں گے جبکہ وہ ممکنہ طور پر ڈراپ بھی ہوسکتے ہیں۔ایک میڈیا آئوٹ لیٹ سے بات کرتے ہوئے شعیب اختر کا کہنا تھا کہ کوئی بھی کھلاڑی ترجیحی سلوک کا مستحق نہیں ہے، اگر اس کی پرفارمنس ٹیم کی مدد نہیں کر رہی ہو۔ان کا کہنا تھا کہ آئی پی ایل پرفارمنس پر مبنی فرنچائز ماڈل ہے جس میں کسی کو بھی نہیں بخشا جائے گا چاہے ویرات کوہلی ہی کیوں نہ ہوں۔انہوں نے کہا کہ اگر وہ پرفارم نہیں کرتے ہیں تو انہیں ڈراپ کیا جا سکتا ہے۔ 10 ہزار چیزیں ایسی ہیں جو میں ابھی نہیں کہہ سکتا۔سابق فاسٹ بولر کا کہنا تھا کہ وہ ایک اچھا انسان، ایک اچھا کھلاڑی اور عظیم کرکٹر ہے لیکن میں چاہتا ہوں کہ وہ ایک وقت میں صرف ایک چیز پر ہی اپنی توجہ مرکوز رکھے۔شعیب اختر کا کہنا تھا کہ کوہلی کو خود کو ایک عام کھلاڑی سمجھنے اور اسٹار ہونے کے دبا ئوکو ایک طرف رکھنے کی ضرورت ہے۔انہوں نے مزید کہا کہ ویرات کوہلی کو چاہیے کہ اپنا بلا اٹھائیں اور صرف کھیلیں کیونکہ لوگ پہلے ہی ان پر انگلیاں اٹھانا شروع ہوچکے ہیں جوکہ خطرناک ہے۔