کمیٹیاں بنانے پر شہباز، عمران کا شکریہ، زرداری، فضل الرحمان سے ملیں گے: لیاقت بلوچ 

لاہور (خصوصی نامہ نگار) نائب امیر جماعت اسلامی، قائمہ کمیٹی سیاسی، قومی امور کے صدر لیاقت بلوچ نے پی ٹی آئی کے سربراہ عمران خان اور وزیراعظم، صدر مسلم لیگ ن میاں شہباز شریف کا شکریہ ادا کیا کہ انہوں نے ملکی سیاسی، انتخابی بحرانوں کے سیاسی سطح پر حل کے لیے کمیٹیاں قائم کردی ہیں۔ جماعت اسلامی کا وفد پی ڈی ایم کے سربراہ مولانا فضل الرحمن، پاکستان پیپلز پارٹی کے قائد، سابق صدر آصف علی زرداری اور دیگر رہنماو¿ں سے ملاقات کرے گا۔ اسی مرحلہ پر جماعت اسلامی کی کمیٹی پی ٹی آئی اور مسلم لیگ ن کے کمیٹی ارکان سے ملاقاتیں بھی کرے گی۔ مذاکرات اور باہم رابطوں کا یک نکاتی ایجنڈا آئین کا تحفظ اور عام انتخابات کا ایک دن یقینی انعقاد ہے۔ ہمیں امید ہے کہ سیاسی جماعتیں اور سیاسی قیادت ضرور حل تلاش کرلیں گی۔ ملی یکجہتی کونسل کے مرکزی رہنماو¿ں لیاقت بلوچ، علامہ عارف واحدی، پیر صفدر گیلانی، سید ناصر شیرازی، پیر ہارون گیلانی، قاری یعقوب شیخ، رضیت باللہ، علامہ بشیر نعیمی اور حافظ زبیر ظہیر نے مشترکہ بیان میں وفاقی وزیرِ مذہبی امور مفتی عبدالشکور کے حادثہ میں المناک وفات پر گہرے دکھ اور صدمہ کا اظہار کیا۔ 
لیاقت بلوچ