ورچوئل یونیورسٹی میں بہارسمسٹر کے طلباءکیلئے استقبالیہ تقریب کا اہتمام

لاہور (کامرس رپورٹر )ورچوئل یونیورسٹی آف پاکستان نے پاکستان بھر کے 200 سے زائد کیمپسز میں نئے داخل ہونے والے طلباء کےلئے استقبالیہ تقریب کا اہتمام کیا۔ ورچوئل یونیورسٹی آف پاکستان نے آج مورخہ 17 اپریل 2023 کو موسم بہار 2023 کے سمسٹر کے لیے مختلف انڈرگریجویٹ اور گریجویٹ پروگراموں میں داخلہ لینے والے اپنے نئے طلباء کےلئے ایک استقبالیہ تقریب کا اہتمام کیا۔ تقریب میں پاکستان بھر سے دس ہزار سے زائد طلباءنے شرکت کی، جنہوں نے 100 سے زائد شہروں میں اپنے قریبی کیمپسز میں آن لائن اور ذاتی طور پر شرکت کی۔ تقریب کا انعقاڈائریکٹر ورچوئل یونیورسٹی پروفیسر ڈاکٹر ارشد سلیم کی زیر صدارت ہوا، انہوں نے نئے طلباء کو خوش آمدید کہا اور انہیں اپنے تعلیمی میدان میں آگے بڑھنے کی ترغیب دی۔ رجسٹرار وی یو پی ڈاکٹر محسن جاوید اور مختلف ڈپارٹمنٹس کے سربراہان نے بھی تقریب میں شرکت کی۔ خطاب کے دوران مختلف ڈپارٹمنٹس کے سربراہان نے آج کی دنیا میں تعلیم کی اہمیت پر روشنی ڈالی اور بتایا کہ کس طرح ورچول یونیورسٹی آف پاکستان اپنے جدید اور ٹیکنالوجی پر مبنی لرننگ پلیٹ فارمز کے ذریعے اپنے طلباء کو معیاری تعلیم فراہم کرنے کے لیے پرعزم ہے۔ انہوں نے طلباء سے کہا کہ وہ ورچوئل یونیورسٹی کے جدید ترین لرننگ مینجمنٹ سسٹم کو مکمل طور پر استعمال کریں۔
، جسے اب مصنوعی ذہانت جیسی جدید ٹیکنالوجیز کے ذریعے اپ گریڈ کیا گیا ہے۔استقبالیہ تقریب طلباء کو ان کے تعلیمی پروگراموں، کیمپس کی سہولیات، اور معاون خدمات کے بارے میں ضروری معلومات فراہم کرنے کے لیے ڈیزائن کی گئی تھی۔ نئے طلباء کو تعلیمی کیلنڈر، امتحانی نظام، درجہ بندی کی پالیسی، اور کورس کے اندراج کے طریقہ کار کا ایک جامع جائزہ دیا گیا۔ ان کا تعارف فیکلٹی ممبران اور اکیڈمک ایڈوائزرز سے بھی کرایا گیا جو ورچوئل یونیورسٹی میں اپنے تعلیمی سفر کے دوران ان کی رہنمائی کریں گے۔