لاہور (نیٹ نیوز) امریکی صدر ڈونلڈ ٹرمپ ہمیشہ ہی دنیا بھر میں میڈیا کی سرخیوں میں رہتے ہیں، جس کی وجہ ان کے اقدامات، ٹوئیٹس یا عجیب دعویٰ ہوتے ہیں مگر ان کی اہلیہ میلانیا بھی اس معاملے میں کسی سے پیچھے نہیں۔ تازہ ترین واقعہ کے مطابق سماجی رابطے کی ویب سائٹ ٹوئٹر پر ایک ویڈیو وائرل ہوئی ہے جس میں میلانیا ٹرمپ ایئر فورس ون سے باہر آتے ہوئے اپنے شوہر اور امریکی صدر ڈونلڈ ٹرمپ کی جانب سے ہاتھ تھامنے کی کوشش کو ناکام بنا رہی ہیں۔ ویڈیو میں دکھایا گیا ہے کہ 50 سالہ امریکی خاتون اول صدارتی طیارے سے باہر آرہی ہیں اور تیز ہوا میں اپنے لباس کو سنبھالنے کی کوشش کر رہی ہیں۔ مگر جب 74 سالہ امریکی صدر کی جانب سے اہلیہ کا ہاتھ تھامنے کی کوشش کی گئی تو میلانیا ٹرمپ نے اسے ناکام بناتے ہوئے اپنا ہاتھ موڑ لیا۔ امریکی صدر کی جانب سے کئی بار ایسی کوشش کی گئی مگر میلانیا نے پھر ہاتھ دینے سے انکار کر دیا جس کے بعد ڈونلڈ ٹرمپ نے اپنا ہاتھ کمر پر رکھ دیا۔ امریکی صدر اور ان کی اہلیہ اپنے 14 سالہ بیٹے بیرن کے ہمراہ نیوجرسی سے واشنگٹن ڈی سی پہنچے تھے۔ ٹوئٹر پر اس حوالے سے لوگوں نے کافی دلچسپ تبصرے کیے۔ یہ پہلی بار نہیں جب میلانیا ٹرمپ نے اپنے شوہر کی جانب سے ہاتھ تھامنے کی کوشش کو ناکام بنایا ہو۔ رواں سال جنوری میں نیواورلینز میں ایک کالج فٹبال میچ کے دوران بھی ایسا ہوا تھا۔