فیوچر ٹورز پروگرام : 4سا ل میں 10ممالک کی ٹیمیں پاکستان کا دورہ کرینگی 

لاہور(اسپورٹس رپورٹر)پاکستان کرکٹ بورڈ نے آئندہ چار سال کیلئے پاکستان کرکٹ ٹیم کے فیوچر ٹور پروگرام کا اعلان کر دیا۔سال 2023 سے 2027 کے دوران آئی سی سی فل بورڈز کے 12 میں سے 10 ممالک کی ٹیمیں پاکستان کا دورہ کریں گی، اس دوران انگلینڈ، نیوزی لینڈ، جنوبی افریقہ، سری لنکا، بنگلہ دیش اور ویسٹ انڈیز کی ٹیمیں ٹیسٹ سیریز کھیلنے پاکستان آئیں گی۔افغانستان، آسٹریلیا، آئرلینڈ اور زمبابوے کی ٹیمیں محدود طرز کی کرکٹ کھیلنے کیلئے پاکستان کا دورہ کریں گی جبکہ اس دوران پاکستان دو سہ ملکی کرکٹ سیریز بھی کھیلے گا۔پاکستان، نیوزی لینڈ اور جنوبی افریقہ کی ٹیموں پر مشتمل پہلی سیریز فروری 2024 میں کھیلی جائے گی اور دوسری سیریز میں انگلینڈ اور سری لنکا کی ٹیمیں پاکستان کے مدمقابل آئیں گی۔چیف ایگزیکٹو پی سی بی فیصل حسنین نے کہاہے کہ پی سی بی نے سال 2023 سے 2027 تک کیلئے فیوچر ٹور پروگرام کو ترتیب دیتے ہوئے معیاری، مسابقتی کرکٹ اور ورک لوڈ مینجمنٹ کو ترجیح دی ہے، کوشش کی گئی ہے کہ تینوں طرز کی کرکٹ کو برابر مواقع دیئے جائیں گے۔ انہیں امید ہے کہ اس عرصے کے دوران پاکستان کرکٹ کے مداحوں کو سنسنی خیز کرکٹ دیکھنے کو ملے گی۔ پی سی بی سہ ملکی کرکٹ سیریز کو پذیرائی دینا چاہتا ہے اور اس ضمن میں آئندہ ایف ٹی پی میں 2 ٹرائی نیشن سیریز رکھی گئی ہیں۔