لاہور(سپورٹس رپورٹر)چین میں جاری ایشین جونیئر سکواش چیمپئن شپ کے دوسرے روز پاکستان کے کھلاڑی انڈر 13، انڈر 15 اور انڈر 17 کے کوارٹر فائنل میں پہنچ گئے۔ انڈر 19 میں پاکستان کے انس علی شاہ کو انڈین کھلاڑی نے شکست دیدی۔ چیمپئن شپ کے دوسرے روز انڈر 19 میں پاکستان کے انس علی شاہ انڈیا کے شوریا باوا کیخلاف2، ایک کی برتری حاصل کرنے کے بعد 3، 2 سے ناکام ہوئے۔عبداللہ نواز نے انڈر 17 میں کوارٹر فائنل کیلئے کوالیفائی کرلیا۔ انہوں نے دوسرے راؤنڈ میں ملائشیا کے کریتھی پیلے کو 3۔ 1 سے شکست دی تاہم اس ہی ایج گروپ میں عبداللہ ندیم کو سیکنڈ سیڈ ملائیشیا کے لو وا سین نے 3۔ 0 سے ہرایا۔ انڈر 15 میں پاکستان کے ابراہیم زیب نے سنگاپور کے ایتھان کاون کو 3۔0 سے شکست دے کر کوارٹر فائنل میں جگہ بنائی۔ انڈر 13 میں پاکستان کے دونوں پلیئرز ، نعمان خان اور احمد رایان خلیلی انڈین پلیئرز کو شکست دے کر کوارٹر فائنل میں پہنچ گئے۔ نعمان نے شریست ایئر اور احمد ریان نے ساوت روہت پٹیل کو شکست دی۔