لاہور؍گوجرہ؍ پیر محل (نامہ نگار) لاہور سمیت صوبہ بھر میں پولیس کا بجلی چوروں کے خلاف سخت کریک ڈاؤن گزشتہ روز بھی جاری رہا۔ پولیس ٹیمیں لیسکو سمیت دیگر اداروں کو کریک ڈاؤن میں بھرپور تعاون فراہم کر رہی ہیں۔ دریں اثناء فیسکو ٹیموں نے مختلف کارروائیوں کے دوران بجلی چوری کرنے پر 5 افراد پکڑ لئے۔ فیسکو ٹاسک فورس نے چک نمبر 285 ج ب کے مون مسیح چک نمبر 334 ج ب کے منور حسین‘ چک نمبر 338 ج ب میں سلیم کو ڈائریکٹ تاریں لگا کر بجلی چوری کرتا ہوا پایا۔ صدر نواں لاہور پولیس نے مقدمات درج کر لئے۔ پیر محل میں فیسکو کی ٹاسک فورس ٹیم نے بھسی روڈ پر واقع اڈا واہگی پر اچانک چھاپے مارتے ہو ئے 2 صارفین حارث مشتاق اور ثاقب کو مبینہ طور پر بجلی چوری کرتے ہو ئے رنگے ہاتھوں پکڑ لیا اور مقدمات درج کرا دیئے۔