بوسنیا سے غیرقانونی طورپردیگرممالک جانے کی کوشش،97پاکستانی گرفتار

سراجیوو(این این آئی)مشرقی یورپی ملک بوسنیا نے کہاہے کہ غیر قانونی مہاجرت سے نمٹنے میں مشکلات پیش آ رہی ہیں، ایسے تارکین وطن کی اکثریت کا تعلق الجزائر، پاکستان اور افغانستان سے ہے۔میڈیارپورٹس کے مطابق بوسنیا کے حکام نے بتایاکہ رواں برس غیر قانونی طور پر اس مشرقی یورپی ملک کی حدود میں داخل ہونے والے تارکین وطن کی تعداد میں نمایاں اضافہ ہوا ہے۔ملکی بارڈر پولیس کے مطابق رواں برس اکتوبر میں 105، نومبر میں 76 جب کہ دسمبر کے پہلے پندرہ دنوں میں 103 افراد غیر قانونی طور پر سرحد عبور کرنے کی کوشش کرتے ہوئے گرفتار کیے گئے۔ علاوہ ازیں اڑتالیس افراد نے غیر قانونی طور پر بوسنیا کی بین الاقوامی سرحد عبور کر کے دوسرے ممالک جانے کی کوشش بھی کی۔بوسنیا ہیرسے گووینا کے حکام کے مطابق اس برس اب تک جن غیر قانونی تارکین وطن کو گرفتار کیا گیا ان میں الجزائر کے 103، پاکستان کے 97 اور افغانستان کے 82 شہری شامل تھے۔