پرتھ ٹیسٹ فیصلہ کن مرحلے میں‘ آسٹریلیا 5وکٹیں ‘بھارت کو 175رنز درکار

پرتھ (سپورٹس ڈیسک) آسٹریلیا نے پرتھ ٹیسٹ میں کامیابی کے لیے بھارت کو 287 رنز کا ہدف دیا ہے جس کے جواب میں بھارت نے کھیل کے چوتھے دن کے اختتام پر 5 وکٹوں کے نقصان پر 112 رنز بنالیے۔پرتھ ٹیسٹ کی دوسری اننگز میں آسٹریلیا کی پوری ٹیم 243 رنز بنا کر پویلین لوٹ گئی جس کے بعد بھارت کو ٹیسٹ جیتنے کے لیے 287 رنز کا ہدف ملا۔ہدف کے تعاقب میں بھارتی اوپنرز لوکیش راہل اور مرالی وجے کریز پر آئے تو مچل اسٹارک کے پہلے اوور کی چوتھی گیند پر راہل بولڈ ہوگئے۔مرالی وجے اور چتیسور پجارا نے دوسری وکٹ پر محتاط انداز اپناتے ہوئے اننگز کو آگے بڑھایا اور اسکور بورڈ پر 13 کا ہندسہ جمایا تو پجارا صرف 4 رنز بنا کر جوش ہیزلی وڈ کی گیند پر وکٹ کے پیچھے کیچ دے بیٹھے۔48 کے مجموعی اسکور پر کپتان ویرات کوہلی بھی 17 رنز بنا کر پویلین لوٹ گئے جب کہ مرالی وجے 20 اور اجنکایا ریہانے 30 رنز کے مہمان ثابت ہوئے۔آسٹریلیا کی جانب سے نیتھن لیون اور جوش ہیزلی وڈ نے 2،2 جبکہ مچل اسٹارک نے ایک وکٹ حاصل کی۔