پشاور (آن لائن) کوہاٹ پولیس نے چار گھنٹوں کی تگ ودو کے بعد کوہاٹ یونیورسٹی کے طالب علم کو اغواء کرنے کی کوشش ناکام بنا کر دو مبینہ اغواء کاروں کو گرفتا ر کر کے مغوی کو بحفاظت بازیاب کر ا لیا۔ پولیس ترجمان کے مطابق عامر اقبال، کرک نے پولیس تھانہ محمد ریاض شہید کو رپورٹ درج کراتے ہوئے بتایا میں اور میرا دوست عاطف اللہ اپنے ہاسٹل واپس آ رہے تھے نارٹیکس تھانہ کے قریب نامعلوم مسلح اغوا کار میرے دوست کو اسلحہ کی نوک پر گاڑی میں لے گئے۔ ڈی پی او کوہاٹ سلیم مروت کے حکم پر پولیس نے فوری ایکشن لیتے ہوئے کوہاٹ کے داخلی و خارجی راستوں پر ناکے لگا کر علاقے کو گھیرے میں لیکر سرچ آپریشن شروع کر دیا۔ پولیس نے نیو تبلیغی مرکز کے قریب دو مبینہ اغواء کاروں نور الامین ولد محمد یونس، دیر بالا اور اسماعیل ولد گلیس خان کو گرفتار کر کے مغوی کو بازیاب کرا لیا ملزمان نے دوران تفتیش اپنے دیگر ساتھیوں کے نام بھی اُگل دئیے۔