اراضی تنازعہ پر کیمبرج مدرسة البنات سیل، اساتذہ، طالبات کا احتجاج 

لاہور (لیڈی رپورٹر) اراضی کے تنازعہ پر چوبرجی میں 70 سال سے قائم کیمبرج مدرستہ البنات سیل کر دیا گیا جس سے سکول میں زیر تعلیم 1200 سے زائد طالبات کے تعلیمی مستقبل پر سوالیہ نشان لگ گیا ہے۔ سکول کی بندش کے خلاف سکول سٹاف نے گزشتہ روز شدید احتجاج کیا۔ اساتذہ اور طالبات ضلعی حکومت کے خلاف شدید نعرے بازی کرتی ہوئی سکول سے باہر نکل آئیں اور لیک روڈ بلاک کردی۔ سکول انتظامیہ کا کہنا ہے کہ پولیس نے بغیر نوٹس سکول سیل کیا اور سکول بورڈ اتار کر بجلی بھی کاٹ دی گئی۔ طالبات نے مطالبہ کیا ہے کہ ہمارا سکول فوری طور پر دوبارہ کھولا جائے بصورت دیگر ہمارا قیمتی سال ضائع ہوجائے گا۔ دوران احتجاج مظاہرین اور شہری انتظامیہ کے مابین روڈ بلاک کرنے پر تلخ کلامی بھی ہوئی جس پر خواتین مظاہرین نے سرکاری گاڑی پر بوتلیں دے ماریں۔ مظاہرین کا کہنا تھا کہ بچیوں کے تعلیمی نقصان پر اعلی حکام معاملہ کا فوری نوٹس لیں۔ مظاہرین نے کہا کہ مطالبات پورے ہونے تک احتجاج جاری رہے گا۔
سکول سیل