لاہور(خصوصی نامہ نگار)تحریک منہاج القرآن کے صدر پروفیسر ڈاکٹر حسین محی الدین قادری نے کہا ہے کہ معراج النبی حضور نبی اکرمؐ کا دائمی معجزہ ہے جس کی عظمت میں وقت کا سفر طے ہونے کے ساتھ ساتھ اضافہ ہوتا جارہا ہے۔ نئے نئے کائناتی انکشافات سامنے آ کر معجزہ معراج النبی کی حقانیت کی گواہی دے رہے ہیں۔ معجزہ معراج النبی حضور نبی اکرمؐ کا زندہ معجزہ ہے۔ یہ معجزہ براہ راست اس بات کی وضاحت کرتا ہے کہ حضور نبی اکرم کی عظمت، رفعت اور حقیقت کسی بھی فردکی سمجھ بوجھ، عقل و خرد اور فہم و فراست کی پرواز سے بلند اور بہت ہی بلند ہے۔ آج صدیاں گزر جانے کے بعد جب سائنسی ارتقا اپنی معراج کو چھورہا ہے کائنات کی بے کراں وسعتیں حضور نبی اکرم کے نقوش کف پا کی تصدیق کررہی ہیں۔ معراج النبیؐ اصل میں معراج بندگی ہے۔ جامع شیخ الاسلام ماڈل ٹائون میں گزشتہ روز اجتماع سے خطاب کرتے ہوئے پروفیسر ڈاکٹر حسین محی الدین قادری نے کہا کہ معجزات انبیائے کرام کی نبوت اور حقانیت پر دلیل ہوتے ہیں۔ معجزات اللہ رب العزت کی قدرت کاملہ کا پرتو ہوتے ہیں۔ معجزہ معراج النبی تاریخ انسانی کا ایسا حیرت انگیز انوکھا اور نادر واقعہ ہے۔ جس کی تفصیلات پر عقل ناتواں حیران و ششدر ہے۔