پاکستان سپر لیگ میں فاسٹ بائولنگ ٹیلنٹ شاندار : کولن منرو

لاہور(سپورٹس رپورٹر) اسلام آباد یونائیٹڈ کے بیٹر کولن منرو نے نوجوان وکٹ کیپر بیٹر اعظم خان کی تعریف کرتے ہوئے کہا ہے کہ انہیں اس بات پر حیرت ہے کہ اعظم پاکستان ٹیم میں کیوں منتخب نہیں ہو رہے۔ اعظم نے کمال کی بیٹنگ کی، انہیں سمجھ نہیں آتا کہ اعظم خان پاکستان ٹیم میں کیوں نہیں کھیل رہے، ان کی اور بھی پلیئرز سے اس حوالے سے بات ہوئی۔ بہت سے لوگ اعظم کے وزن پر اعتراض کرتے ہیں لیکن اگر وہ پاکستان کے بہترین بیٹرز میں سے ایک ہیں تو پھر انہیں ٹیم میں کیوں نہیں لیا جارہا۔ اس وکٹ پر 175 اچھا سکور تھا، کراچی کے حیدر نے اچھی بیٹنگ کی لیکن اسلام آباد کو اس کی حکمت عملی کام آگئی، ریسائی ون ڈر ڈوسن اور اعظم نے شاندار بیٹنگ کی۔پاکستان سپر لیگ کی تعریف کرتے ہوئے کہا کہ ہر کوئی کہتا ہے کہ پاکستان سپر لیگ میں فاسٹ بائولنگ کا ٹیلنٹ شاندار ہے، کچھ بائولرز تو ایسے ہیں جن کا سامنا کرنے سے بیٹسمین گھبراتے ہیں۔ ایک روز قبل ملتان کی جانب سے احسان اللہ نے شاندار بائولنگ بلکہ بہت تیز بائولنگ کی، پاکستان سپر لیگ ایک مشکل ٹورنامنٹ ہے کیوں کہ یہاں مختلف کنڈیشنز کا سامنا کرنا پڑتا ہے لیکن اس بات میں کوئی شک نہیں کہ یہ دنیا کے بہترین ٹورنامنٹس میں سے ایک ہے۔