قائداعظم ٹرافی : لاہور شالیمار نے ایبٹ آباد کو 222 رنز سے شکست دیدی

لاہور(سپورٹس رپورٹر) پاکستان کرکٹ بورڈ کے زیراہتمام قائداعظم ٹرافی گروپ ٹو کے میچ میں لاہورشالیمار نے ایبٹ آباد کو 222 رنز کے بھاری مارجن سے شکست دے دی۔ ایبٹ آباد کی ٹیم 480 رنز کے ہدف کے تعاقب میں دوسری اننگز میں 258 رنز پر ڈھیر ہو گئی۔ یاسرحمید 51 رنز بنا کر نمایاں رہے، حماد علی 50 رنز بنا کر ناٹ آﺅٹ رہے۔ محمد عرفان نے 5 کھلاڑیوں کو پویلین کی راہ دکھائی۔ جمعرات کے روز صوابی میں کھیلے گئے میچ کے آخری روز ایبٹ آباد کی ٹیم نے لاہور شالیمار کے خلاف 150 رنز 6 کھلاڑی آﺅٹ پر دوسری نا مکمل اننگز شروع کی تو اس کے بقیہ چار کھلاڑی گزشتہ دن کے سکور میں صرف 108 رنز کا اضافہ کر سکے اور پوری ٹیم 258 رنز پر پویلین لوٹ گئی۔ محمد عرفان سب سے کامیاب باﺅلر رہے، انہوں نے 5 کھلاڑیوں کو آﺅٹ کیا جبکہ اعزاز چیمہ اور سعد نسیم نے دو، دو اور اظہر اطاری نے ایک وکٹ حاصل کی۔