میلبورن (اے پی پی) سربیا کے نامور ٹینس سٹار، ٹاپ سیڈ اور دفاعی چیمپئن نوویک جوکووچ ، انگلینڈ کے اینڈی مرے، فرانس کے جوویلفرائیڈ تسونگا، کروشیا کے مارین کلک اور جنوبی افریقہ کے کیون اینڈرسن آسٹریلین اوپن ٹینس ٹورنامنٹ کے تیسرے راﺅنڈ میں پہنچ گئے۔ دوسرے راﺅنڈ کے دیگر میچوں میں جرمنی کے فلپ کولیشرائبر، سپین کے فرنینڈو ورڈاسکو، اٹلی کے اینڈرس سیپی اور فرانس کے جریمی چارڈے نے کامیابی حاصل کرکے تیسرے راﺅنڈ کیلئے کوالیفائی کر لیا۔ ٹاپ سیڈ وکٹوریہ آذارینکا، سرینا ولیمز، کیرولین وزنائیکی اور ماریا کیریلنکو آسٹریلین اوپن ٹینس ٹورنامنٹ تیسرے راﺅنڈ میں پہنچ گئیں۔ دوسرے راﺅنڈ کے دیگر میچوں میں امریکہ کی ہوپٹن، روس کی ایلینا ویسنینا، اٹلی کی وینسی اور جاپان کی موریٹا نے کامیابی حاصل کرکے میگا ایونٹ کے تیسرے راﺅنڈ کیلئے کوالیفائی کر لیا۔ ویمنز ڈبلز ایونٹ میں بھی ولیمز سسٹرز نے فاتحانہ آغازکرتے ہوئے دوسرے راﺅنڈ کے لیے کوالیفائی کرلیا۔ ولیمزسسٹرز نے پہلے راﺅنڈ میں کامیلا گیورجی اور سٹیفن وئجل کی جوڑی کو شکست دی۔ مارکوس بگڈاٹس اور گریگورڈیمی ٹروو آسٹریلین اوپن ٹینس ٹورنامنٹ مینز ڈبلز کے دوسرے راﺅنڈ میں پہنچ گئے۔ مارکوس بگڈاٹس اور گریگورڈیمی ٹروو نے پہلے راﺅنڈ میں میتھیوایبڈین اور ریان ہریسن کو شکست دی۔ پاکستانی ٹینس سٹار اعصام الحق قریشی آسٹریلین اوپن ٹینس ٹورنامنٹ مینز ڈبلز کے دوسرے راﺅنڈ میں آج ایکشن میں دکھائی دیں گے۔ اعصام الحق اور جین جیولین راجر کا مقابلہ زیوائر میلسی اور ڈک نورمن پر مشتمل بیلجیئم کی جوڑی سے ہو گا۔ بھارتی ٹینس سٹار ثانیہ مرزا بوب برائن کے ساتھ آسٹریلین اوپن ٹینس ٹورنامنٹ مکسڈ ڈبلز کے پہلے راﺅنڈ میں آج ایکشن میں دکھائی دیں گی۔ ثانیہ مرزا پہلی بار امریکہ کے شہرہ آفاق ڈبلز پلیئر بوب برائن کے ہمراہ مکسڈ ڈبلز ایونٹ میں کورٹ میں اتریں گی۔