آسٹریلین اوپن ٹینس : ڈیوڈ فیرر ‘ لی نا ‘ سرینا ولیمز چوتھے رائونڈ میں پہنچ گئے

  میلبورن (اے پی پی) سپین کے تھرڈ سیڈڈ ڈیوڈ فیرر اور جرمنی کے فلورین میئر آسٹریلین اوپن ٹینس ٹورنامنٹ کے مینز سنگلز کے چوتھے رائونڈ میں پہنچ گئے۔ سپین کے ڈیوڈ فیرر نے فرانس کے حریف جریمی چارڈے کو سٹریٹ سیٹس میں  6-2، 7-6 (7-5) اور 6-2 سے شکست دے کر چوتھے رائونڈ کے لئے کوالیفائی کرلیا۔ جرمنی کے فلورین میئر نے  حریف پائولش جرزی جانوویکز کو  سٹریٹ سیٹس میں 7-5، 6-2  اور 6-2 سے ہرا کر میگا ایونٹ کے چوتھے رائونٖڈ کے لئے کوالیفائی کرلیا۔ سوئیٹزرلینڈ کے سٹانسلاس وارینکا نے کو کینیڈا کے واسک پوسپیسل کے خلاف واک اوور مل گیا۔امریکہ کی شہرت یافتہ ٹینس سٹار اور عالمی نمبر ایک سرینا ولیمز اور چین کی لی نا اپنی پیش قدمی کے سلسلے کو بڑھاتے ہوئے آسٹریلین اوپن ٹینس ٹورنامنٹ کے ویمنز سنگلز کے چوتھے رائونڈ میں پہنچ گئیں۔  سرینا ولیمز نے سلواکیہ کی ڈینیلا ہینچوا کو سٹریٹ سیٹس میں 6-3 اور 6-3 سے ہرا کر میگا ایونٹ کے چوتھے رائونڈ کے لئے کوالیفائی کرلیا۔ چین کی لی نا نے سخت مقابلے کے بعد جمہوریہ چیک کی لوئس سفاروا کو 1-6،7-6(7-2) اور 6-3 سے  زیر کر کے چوتھے رائونڈ تک رسائی حاصل کی۔ جرمنی کی انجلی کیو کربر نے امریکہ کی الیسن ریسکی کو سٹریٹ سیٹس میں 6-3 اور 6-4 سے ہرا کر چوتھے رائونڈ کیلئے کوالیفائی کیا۔ آسٹریلیا کی کیسے ڈیلاکیوا، روس کی اکاترینا ماکاروا، کینیڈا کی  اوگینی بوچارڈ اور اٹلی کی فلاویہ پینی یٹا نے اپنے اپنے میچز جیت کر چوتھے رائونڈ کے لئے کوالیفائی کرلیا۔