نواب شاہ +کراچی (نوائے وقت نیوز+کرائم رپورٹر) نواب شاہ سکول وین حادثے میں زخمی مزید ایک طالبہ سدرہ کراچی کے نجی ہسپتال میں دم توڑ گئی۔ جاں بحق ہونے والوں کی تعداد 23 ہوگئی۔ 8 زخمی بچے کراچی اور نواب شاہ کے ہسپتالوں میں زیر علاج ہیں۔ دوسری جانب ضلع نواب شاہ کے شہر دولت پور میں سکول وین حادثے کا شکار بچوں اور دیگر افراد کے سوئم کے سلسلے میں مختلف مساجد میں قرآن خوانی اور فاتحہ کا اہتمام کیاگیا ۔ واقعے کے سوگ میں شہر بھر کے نجی سکول بند رہے۔ سانحے کے بعد شہر بھر میں غم اور سوگ کی فضا ہے۔ واقعے کا مقدمہ تعلقہ تھانہ نواب شاہ میں ڈمپر ڈرائیور اور اس کے دو ساتھیوں کے خلاف درج کرلیا گیا ہے۔ تینوں کی تلاش جاری ہے۔