کراچی(کامرس ڈیسک) ایمریٹس نے سال 2018ء کا خیر مقدم کرتے ہوئے پاکستان سے مسافروں کے لئے نئے مقامات اور پسندیدہ شہروں کے سفر کی حوصلہ افزائی کے لئے عالمی سطح پر رعایتی نرخوں پر فضائی ٹکٹس کی فراہمی کا اعلان کیا ہے۔ اس نئے سال ایمریٹس کا وعدہ ہے کہ دنیا کے مختلف ممالک کا سفر کرنے والے پاکستانیوں کو نئے دلچسپ ایڈونچرز اور تجسس آمیز تجربات سے روشناس کرایا جائے۔ اس مقصد کے لئے ایمرٹس نے محدود مدت کے لئے بزنس کلاس اور اکانومی کلاس کے کرایوں پر خصوصی رعایتی نرخ متعارف کرائے ہیں۔یہ رعایتی نرخ چھ براعظموں کے مختلف شہروں کے سفر کے لئے ہیں۔ اس ضمن میں مقامی شرائط و ضوابط کے ساتھ 19 جنوری سے 30 جون 2018 تک سفر کے لئے رعایتی نرخوں پر 16 جنوری سے 29 جنوری تک بکنگ کرائی جاسکتی ہے۔ خصوصی مہم کے تحت پاکستان سے سفر کے لئے بزنس کلاس میں رعایتی نرخوں کے ساتھ کرایوں کا آغاز امریکاز کے لئے 2لاکھ21ہزار 332روپے، یورپ کے لئے ایک لاکھ 86 ہزار 737 روپے، افریقہ کے لئے 2 لاکھ 7 ہزار 26 روپے اور مشرق وسطیٰ کے لئے 93 ہزار 168 روپے سے ہورہا ہے۔ اسی طرح اکانومی کلاس میں رعایتی نرخوں کے ساتھ کرایوں کا آغاز امریکاز کے لئے 90 ہزار 292 روپے، یورپ کے لئے 49 ہزار 667 روپے، افریقہ کے لئے 51 ہزار 846 روپے اور مشرق وسطیٰ کے لئے 24 ہزار 541 روپے سے ہورہا ہے۔