سوات (نامہ نگار‘ نوائے وقت رپورٹ) سوات کی تحصیل کبل کے علاقے نصرت کالا کلے میں ہینڈ گرینیڈ پھٹنے سے 2 بچے موقع پر جاں بحق ایک زخمی ہوگیا۔ ریسکیو 1122ذرائع کے مطابق گزشتہ شام کے وقت علاقے کے بچوں کو ایک ہینڈ گرینیڈ ملا جسے کھلونا سمجھ کر وہ کھیلتے رہے، کھولنے کی کوشش کے دوران ہینڈ گرینیڈ زوردار دھماکہ سے پھٹ گیا۔ ابتدائی اطلاعات کے مطابق ہینڈ گرینیڈ کے ٹکڑے لگنے سے دو بچے موقع پر جاں بحق ہوگئے ہیں جبکہ ایک بچہ شدید زخمی ہے۔ اطلاع ملنے پر ریسکیو اہلکاروں نے جائے وقوعہ پہنچ کر مرنے والے بچوں کی لاشیں اور زخمی بچے کو ہسپتال منتقل کردیا ہے۔ مقامی پولیس بھی جائے وقوعہ پر پہنچ کر شواہد اکھٹا کررہی ہے۔ پولیس کے مطابق بچوں کو دستی بم کھیتوں سے ملا‘ گھر آ کر آگ میں ڈالنے پر دھماکہ ہو گیا۔