میرواہ گورچانی (نامہ نگار) موٹر سائیکل اور رکشہ میں تصادم ایک نوجوان جاں بحق ،تین افراد زخمی۔ تفصیلات کے مطابق میرواہ گورچانی کے قریب مین میرپورخاص روڑ (قاتل روڑ) پر واقع کھمبڑی اسٹاپ پر ایک تیز رفتار موٹر سائیکل اور چنگچی رکشے میں خوفناک تصادم ہوگیا۔ حادثے کے نتیجے میں موٹر سائیکل سوار 28 سالہ محسن ولد مانک لغاری ,30 سالہ کامران ولد شاہد لغاری آور رکشہ سوار 36 سالہ آمو لکھ ولد چیتن بھیل اور 37 سالہ ساون ولد جاندو بھیل زخمی ہو گئے - چاروں زخمیوں کو فوری طور پر دیہی صحت مرکز میرواہ گورچانی لایا گیا بعد ازاں دونوں موٹر سائیکل سوار محسن اور کامران کو تشویشناک حالت میں سول ہسپتال میرپورخاص منتقل کر دیا گیا جہاں پر محسن ولد مانک لغاری زخموں کی تاب نہ لاتے ہوئے چل بسا- ہلاک و زخمی موٹر سائیکل سوار گوٹھ کھمبڑی کے رہائشی ہیں جو کہ قریبی گوٹھ بورجی میں شادی کی تقریب میں شرکت کے لیے جا رہے تھے کہ حادثے کا شکار ہو گئے - حادثے کے باعث شادی کے خوشیوں بھرے گھر میں کہرام مچ گیا - میرواہ گورچانی و میرپورخاص روڑ جو قاتل روڑ کہلاتا ہے یہ روڑ ایک رویہ ہونے کی وجہ سے سینکڑوں قیمتی انسانی زندگیوں کو نگل گیا ہے مگر حکومت،منتخب عوامی نمائندے اور ضلعی انتظامیہ خاموش تماشائی بنی بیٹھی ہے شہریوں کا کہناہے کہ اس اہم شاہراہ کو دو رویہ کیا جائے تاکہ قیمتی انسانی جانوں کو حادثات سے بچایا جا سکے-