ہر بیٹی کی پیدائش پر قسمت بدلتے محسوس کی ‘ شاہد آفریدی کا بیان وائرل

لاہور ( اسپورٹس رپورٹر) پاکستان کرکٹ ٹیم کے سابق کپتان شاہد آفریدی نے کہا ہے کہ میں بیٹیوں کا باپ ہونے پر خود کو خوش قسمت سمجھتا ہوں۔شاہد آفریدی کی بڑی بیٹی اقصی آفریدی کی شادی کے بعد سابق کرکٹر کا بیٹیوں کے بارے میں دیا گیا ماضی کا ایک بیان دوبارہ سوشل میڈیا صارفین کی توجہ کا مرکز بن گیا ۔شاہد آفریدی سے گزشتہ برسوں کے دوران کئی انٹرویوز کے دوران یہ سوال پوچھا گیا کہ کیا انہیں کبھی زندگی میں بیٹے کی کمی محسوس ہوئی؟۔ اس حوالے سے شاہد آفریدی کی ہمیشہ سے یہی رائے رہی ہے کہ وہ بیٹیوں کا باپ ہونے پر اپنے آپ کو خوش قسمت سمجھتے ہیں۔انہوں نے اپنے ایک انٹرویو میں کہا کہ میری بیٹیاں میری قسمت ہیں میں اپنی زندگی میں بیٹیوں کی وجہ سے ہی کامیاب ہوں۔انہوں نے کہا کہ میری 5بیٹیاں ہیں اور میں نے ہر بیٹی کی پیدائش پر اپنی قسمت بدلتے محسوس کی ہے۔شاہد آفریدی نے تمام بیٹیوں کے والدین کو مشورہ دیا کہ آپ سب اپنی بیٹیوں کو اتنا قابل اور ہمت والا بنائیں کہ آپ کو زندگی میں کبھی بیٹے کی کمی محسوس نہ ہو۔