لاہور(نامہ نگار)پاکستان پیپلز پارٹی کے ڈیجیٹل میڈیا ہیڈ شرجیل انعام میمن نے کہا ہے کہ پنجاب میں انتظامیہ ہمارے فلیکس اور بینرز اتار رہی ہے۔الیکشن کمیشن سے اپیل ہے اس پر نوٹس لیں اورپیپلز پارٹی کے فلیکس نہ اتارے جائیں۔وہ پیپلز سیکرٹریٹ ماڈل ٹاؤن میں ذوالفقار علی بدر،فیاض بھٹی‘نیلم ‘جبار اور نایاب جان کیساتھ میڈیا سے گفتگو کر رہے تھے۔ پیپلز پارٹی واحد جماعت ہے جو الیکشن کی تیاریاں کر رہی ہے۔پیپلز پارٹی کے چیئرمین بلاول بھٹو ملک بھر میں جلسے کر رہے ہیں۔بیشتر جماعتیں الیکشن سے بھاگنے کی کوشش کر رہی ہیں،پنجاب کے لوگ ن لیگ سے تنگ آ چکے ہیں۔افسوس کی بات ہے ن لیگ پنجاب میں کوئی بھی اچھا ہسپتال نہیں بنا سکی،ن لیگ پیپلز پارٹی کے منصوبوں کو اپنے حصے میں ڈالنے کی کوشش کرتی ہے۔ن لیگ ہو یا پی ٹی آئی صحت کے لئے کسی نے کام نہیں کیا۔