او جی ڈی سی ایل کی اقلیتی ملازمین کو مذہبی مقامات کی زیارت کیلئے قرعہ اندازی

 اسلام آباد(نمائندہ نوائے وقت )او جی ڈی سی ایل نے عیسائی اور ہندو برادریوں سے تعلق رکھنے والے ملازمین کے لئے ان کے متعلقہ مقدس مذہبی مقامات کی زیارت کے لیے قرعہ اندازی کا اہتمام کیا،قرعہ انداز ی او جی ڈی سی ایل ہیڈ آفس اسلام آباد میں منعقد ہوئی جس میں او جی ڈی سی ایل سی بی اے کے عہدیداران، دونوں کمیونٹیز کے ممبران اور او جی ڈی سی ایل کی سینئر مینجمنٹ بھی موجود تھی۔مسیحی برادری کے سات مستحق افراد کو ویٹیکن سٹی کے سفر کے لیے منتخب کیا گیا اورمزید پانچ افراد کوویٹنگ لسٹ میں رکھا گیاہے۔ خوش نصیب ملازمین کا انتخاب مسیحی برادری سے تعلق رکھنے والے کمپنی کے 78 ملازمین کی فہرست سے کیا گیا۔  دریں اثنا، ہندو برادری کے ایک رکن کو ہندو مقدس مقامات کی زیارت کے لیے منتخب کیاگیا، جب کہ دو دیگر افراد کو ویٹنگ لسٹ میں رکھا گیا۔ انہیں ہندو برادری سے تعلق رکھنے والے کمپنی کے 27 ملازمین کی فہرست سے منتخب کیا گیا۔