لاہور (نامہ نگار) شہر میں ڈاکوؤں اور چوروں نے چوری و ڈکیتی کی وارداتوں میں متعدد شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں، گاڑیاں اور دیگر سامان لوٹ لیا ہے۔ تفصیلات کے مطابق رائیونڈ سٹی کے علاقے مانگا روڈ میں 3 ڈاکوئوں نے موبائل فون کی دکان میں گھس کر عملے اور گاہکوں کوگن پوائنٹ پر یرغمال بنا کر 25لاکھ روپے نقدی اور 10 موبائل فون لوٹ لئے اور فرار ہو گئے ہیں۔ لیاقت آباد کے علاقے میں عمر اور اس کی فیملی سے گن پوائنٹ پر 5 لاکھ روپے مالیت کی نقدی اور طلائی زیورات، گارڈن ٹاؤن کے علاقے میں احتشام سے 80ہزار روپے اور موبائل فون، کوٹ لکھپت کے علاقے میں سرور سے گن پوائنٹ پر 60ہزار روپے اور موبائل فون، گلبرگ کے علاقے میں خورشید سے گن پوائنٹ پر 50 ہزار روپے اور موبائل فون، لٹن روڈ کے علاقے میں فہد سے گن پوائنٹ پر 21ہزار  3سو روپے اور موبائل فون، ملت پارک کے علاقے میں پرویز سے 15ہزار روپے اور موبائل فون، جوہر ٹاؤن کے علاقے میں عمیرسے گن پوائنٹ پر 10 ہزار روپے اور موبائل فون، اسلام پورہ کے علاقے می سلمان سے گن پوائنٹ پر 5ہزار روپے اور موبائل فون لوٹ لیا اور فرار ہوگئے ہیں۔ چوروں نے شمالی چھاؤنی کے علاقے میں امجد کے گھر کے تالے توڑ کر 10لاکھ روپے مالیت کی نقدی، طلائی زیورات اور الیکٹرانکس سامان چوری کر لیا ہے۔ چوروں نے گلشن راوی، جوہر ٹاؤن اور ڈیفنس کے علاقوں میں سے 3 کاریں، سندر کے علاقے میں سے رکشہ جبکہ داتا دربار، کاہنہ، فیکٹری ایریا، باٹا پور، ٹبی سٹی، مانگا منڈی، پرانی انارکلی، اسلام پورہ اور شادمان کے علاقوں میں سے 9 موٹر سائیکلیں چوری کر لی ہیں۔