اسلام آباد (سٹاف رپورٹر) پاک فضائیہ کے JF-17 تھنڈر لڑاکا جہاز نے گزشتہ روز پیرس ائرشو میں پھر شاندار فضائی کرتب دکھائے۔ لوگوں کی ایک بڑی تعداد پاکستان کے لئے سرمایہ افتخار اس جہاز کے ناقابلِ یقین کرتب دیکھنے کیلئے موجود تھی۔حاضرین نے پاک فضائیہ کے ائرو بیٹکس دستے کی کارکردگی کو سراہا اور انہیں دل کھول کر داد دی۔ فضائیہ کے پریس بیان کے مطابق اپنے ہم عصر جنگی جہازوں میں JF-17 تھنڈر کو ایک نمایاں حیثیت حاصل ہے۔ پاکستان ائروناٹیکل کمپلیکس اور CATIC کی مشترکہ کاوش JF-17 تھنڈر ایک کم قیمت، بہت طاقتور، ہمہ جہت جنگی جہاز ہے جو کہ حال اور مستقبل کی فضائی طاقت کے چیلنجز کو پورا کرنے کی صلاحیت رکھتا ہے۔ جہاز کے اندرڈیجیٹل فلائی بائی وائر فلائٹ کنٹرول سسٹم لگا ہوا ہے جو اسے ہر قسم کے مشن میں فوقیت دلاتا ہے۔ اس جہاز کا کاک پٹ مکمل شیشے کا بنا ہوا ہے۔ اور اس کے اندر ایک شاندار کمپیوٹرائزڈ نظام موجود ہے جو اسے نہ صرف اپنی حفاظت میں مدد دیتا ہے بلکہ اس کے لڑنے کی صلاحیت میں اضافہ کرتا ہے۔ یہ طیارہ جدید ترین ایویانکس سسٹم سے مزین ہونے کے ساتھ ساتھ ہر قسم کے جدید ہتھیاروں، بمبوں، فضا سے فضا اور فضا سے زمین پر اور اینٹی شپ میزائل سے لیس ہے۔ اس طیارے کی چھوٹے رن وے سے ٹیک آف اور لینڈنگ کی صلاحیت اسے ہر قسم کے فضائی آپریشن میں معاون ثابت ہوتی ہے۔