لاہور(سپورٹس رپورٹر) دورہ انگلینڈ اورویسٹ انڈیز کیلئے منتخب کردہ وائٹ بال ٹیم کے پاکستان میں موجود کرکٹرز اور آفیشلز کی کرونا ٹیسٹنگ رپورٹس منفی آگئی ہیں۔بائولنگ کوچ وقار یونس کا ابھی ٹیسٹ نہ ہوا۔ ذرائع کے مطابق تمام کرکٹرزاور مینجمنٹ ارکان نے اپنی اپنی رپورٹس کے بار ے میں پی سی بی کو آگاہ کردیاہے،اب یہ تمام ارکان بیس جون کو لاہور میں بائیوسکیورببل کا حصہ بننے کیلئے رپورٹ کریں گے، جہاں  پی سی بی کی جانب سے باقاعدہ دوبارہ ان کی کرونا ٹیسٹنگ ہوگی۔تیسری بار ان سب کو ٹیسٹنگ کے مرحلے سے23  جون کو گزرنا پڑیگا، پچیس جون کو وائٹ بال ٹیم کے ارکان خصوصی طیارے کے ذریعے براستہ ابوظہبی مانچسٹر کی اڑان بھریں گے، لاہور سے ،حارث سہیل ، سعود شکیل اور عبداللہ شفیق ‘ہیڈ کوچ مصباح الحق ، بائولنگ کوچ وقار یونس ،بیٹنگ کوچ یونس خان ، اسسٹنٹ ٹو منیجر شاہد اسلم ، ڈاکٹر ریاض احمد ، ٹرینریاسر ملک ، سکیورٹی منیجرکرنل ریٹائرڈ مکرم، فیلڈنگ کوچ عبدالمجید اور میڈیا منیجر ابراہیم بادیس روانہ ہوں گے۔