گوجرانوالہ (نمائندہ خصوصی)گوجرانوالہ میںکھیل کود کے دوران گندے نالے میں گر کر دو کمسن بچے جاں بحق ہو گئے، ریسکیو ٹیموں نے آپریشن کر کے نعشیں نکال لیں،گکھڑ منڈی کے علاقہ محلہ لکھ داتا میں نالے کی پٹڑی پر کھیلنے والے دو کمسن بچے3 سالہ علی اور 5 سالہ عبدالمنان پائوں پھسلنے سے نالے میں گر گئے، اہل علاقہ کی اطلاع پر ریسکیو ٹیمیں موقع پر پہنچ گئیں اور نالے میں ڈوبنے والے دونوں بچوں کی نعشیں نکال کر ورثاء کے حوالے کر دیں دونوں بچوں کی نعشیں جب ان کے گھروں میں پہنچیں تو کہرام مچ گیا اس موقع پر ہر آنکھ اشکبار تھی، معلوم ہوا ہے کہ دونوں بچے آپس میں کزن تھے اور علی 4 بہنوں کا اکلوتا بھائی تھا۔ جاں بحق ہونیوالے 2 بھائیوں ندیم اور نوید کے بیٹے تھے۔