اسلام آباد ( سپورٹس رپورٹر)پاکستان نے ناقابل شکست ریکارڈ برقرار رکھتے ہوئے جونیئر ڈیوس کپ ایشیا اوشیانا پری کوالیفائنگ ٹورنامنٹ جیت لیا، گرین شرٹس نے پیسفک اوشیانا کو فیصلہ کن معرکے میں 2-1 سے شکست دی۔ سری لنکا کیء دارلحکومت کولمبو میں منعقدہ ایونٹ میں ہفتہ کو کھیلے گئے ایونٹ کے فائنل میں پاکستانی ٹیم نے شاندار کھیل پیش کرتے ہوئے پیسفک اوشیانا کو 2-1 سے ہرا کر ٹائٹل اپنے نام کیا، پہلے سنگل مقابلے میں پاکستانی کھلاڑی حذیفہ عبدالرحمان نے پیسفک اوشیانا کے روبرٹ کو 6-0 اور 6-1 سے ہرا کر ٹیم کو برتری دلائی، دوسرے سنگل مقابلے میں پیسفک اوشیانا کے کلیمنٹ نے پاکستان کے محمد شعیب کو 6-4 اور 6-3 سے ہرا کر مقابلہ برابر کر دیا، حذیفہ عبدالرحمان اور محمد شعیب پر مشتمل پاکستانی جوڑی نے ڈبل مقابلے میں کلیمنٹ اور کین سونگ پر مشتمل پیسفک اوشیانا کی جوڑی کو 6-1 اور 6-1 سے ہرا کر ٹیم کو 2-1 سے کامیابی دلائی، اس کے ساتھ ہی پاکستان نے جونیئر ڈیوس کپ ایشیا اوشیانا پری کوالیفائنگ ٹورنامنٹ جیت لیا۔