اسلام آباد : تنخواہوں کے معاملے پر وزیراعظم عمران خان کی اظہار ناراضی کے بعد وزیراعلیٰ پنجاب سے پہلی ملاقات آج ہوگی ۔ عثمان بزدارپنجاب حکومت کے متعدد امور پر وزیراعظم کواعتماد میں لیں گے۔
تفصیلات کے مطابق وزیراعظم عمران خان اور وزیراعلیٰ پنجاب عثمان بزدار کی اہم ملاقات آج ہو گی۔ وزیراعلیٰ نے لاہور میں دیگر مصروفیات ترک کردی اور ملاقات کے لئے وزیراعلیٰ پنجاب تھوڑی دیرمیں اسلام آباد روانہ ہوں گے۔
تنخواہوں کے معاملے پر وزیراعظم کے اظہار ناراضی کے بعد پہلی ملاقات ہوگی، ملاقات میں پنجاب حکومت کےامور زیر بحث آئیں گے جبکہ ارکان پنجاب اسمبلی، وزیراعلیٰ کی تنخواہ میں اضافے کا معاملہ بھی زیر غور آنے کا امکان ہے۔ملاقات میں عثمان بزدار پنجاب حکومت کے متعدد امور پر وزیراعظم کو اعتماد میں لیں گے۔
یاد رہے وزیراعظم عمران خان نے پنجاب اسمبلی میں ارکان کی تنخواہوں میں اضافے پر ناراضگی کا اظہار کرتے ہوئے کہا تھا ہمارے پاس عوام کو بنیادی سہولتیں فراہم کرنے کے وسائل نہیں، یہ فیصلہ بالکل بلاجواز ہے۔بعد ازاں وزیرِ اعظم عمران خان نے وزیراعلی اور ارکان اسمبلی کی تنخواہوں میں اضافے کی سمری روکنے کی ہدایت کرتے ہوئے عثمان بزدار کو دی گئی لائف ٹائم مراعات کے فیصلے پر بھی نظرِ ثانی کی ہدایت کی تھی۔
واضح رہے پنجاب اسمبلی میں اراکین کی تنخواہوں میں اضافے کا بل کثرت رائے سے منظور کرلیا گیا تھا ۔ جس کے مطابق اراکین اسمبلی کوماہانہ ایک لاکھ 95 ہزارتنخواہ ملےگی۔بل کے مطابق اسپیکرپنجاب اسمبلی ہر ماہ 2 لاکھ 60ہزارروپے ، ڈپٹی اسپیکر2لاکھ45ہزارروپے اور وزیراعلیٰ پنجاب4لاکھ 25 ہزار روپے تنخواہ ماہانہ لیں گے۔
