پی ڈی ایم کی ہنڈیا بیچ چوراہے پھوٹی‘ زرداری جیت گئے: فردوس عاشق

لاہور (نیوز رپورٹر) وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ جعلی راج کماری کی سیاست زمین بوس ہو گئی ہے۔ پی ڈی ایم کی گھٹیا سیاست کا جنازہ اٹھ گیا۔ غیرفطری اتحاد اپنے عبرتناک انجام کو پہنچ گیا۔ فردوس عاشق اعوان نے پریس کانفرنس کرتے ہوئے کہا کہ پی ڈی ایم کی ہنڈیا بیچ چوراہے میں پھوٹ پڑی۔ زرداری صاحب کو چیمپئن شپ اور لیگ جیتنے کا اعزاز حاصل ہوا۔ سابق صدر نے نواز شریف کے لالچی چہرے کو بھانپ لیا تھا۔ اسحاق ڈار پاکستان آئے تو سیاسی جرم کا اعتراف کریں گے۔ ان کو شاہد خاقان عباسی نے فرار کروایا۔ انہوں نے کہاکہ لانگ مارچ کے لئے حوصلہ اور ہمت چاہیے۔ جن کی رگوں میں کرپشن رچ بس گئی ہو، وہ لانگ مارچ کر سکتے ہیں نہ استعفے دے سکتے ہیں۔ مولانا حلوہ کھانے نکلے تھے لیکن مولانا کے ساتھ جو کچھ ہوا، اس کے بعد انہیں خلوت میں چلے جانا چاہیے۔ انہوں نے کہا کہ کرونا کی تیسری لہر کے پیش نظر لانگ مارچ یا عوامی اجتماعات کرنا عوام کے ساتھ کھلی دشمنی ہے۔