سپیشل آپریشن رینجرز ٹروپس کورس سیریل 30 کی پاسنگ آؤٹ پریڈ

لاہور(نیوزرپورٹر)سپیشل آپریشن رینجرز ٹروپس کورس سیریل 30 کی پاسنگ آؤٹ پریڈ کی تقریب کا انعقاد رینجرز بیٹل سکول، رکھ ٹیڑا میں ہوا۔تقریب کے مہمان خصوصی ڈائریکٹر جنرل پاکستان رینجرز پنجاب میجر جنرل سید آصف حسین تھے۔ مہمان خصوصی نے کمانڈوز کے انسداد دہشت گردی کے مظاہرے کو دیکھا اور بحران کی صورتحال سے نمٹنے میں ان کی تربیت، چستی اور فوری ردعمل کو سراہا۔ پریڈ سے خطاب کرتے ہوئے مہمان خصوصی نے اس بات پر روشنی ڈالی کہ یہ فورس بہادری کی بھرپور تاریخ رکھتی ہے اور اس نے دشمن کی جارحیت کا مقابلہ کرتے ہوئے ہمیشہ اپنی صلاحیتوں کا لوہا منوایاہے۔ پاکستان رینجرز پنجاب ایک متحرک فورس ہے جو سرحدوں کا دفاع کرنے کی صلاحیت رکھتی ہے۔ اس وقت پاکستان مشکل دور سے گزر رہا ہے جہاں پنجاب رینجرز اندرونی سکیورٹی کے انتظامات میں غیر معمولی کام کر رہی ہے۔ ڈی جی رینجرز پنجاب نے سخت تربیت کامیابی سے مکمل کرنے پر رینجرز جوانوں کو مبارکباد دی۔ آخر میں مہمان خصوصی نے پوزیشن حاصل کرنے والے جوانوں میں انعامات تقسیم کیے اور کامیاب کمانڈوز کے سینے پر بیجز بھی لگائے۔