گلستان جوہر کراچی کا مغوی 3ماہ بعد کشمورسے بازیاب

کراچی (اسٹاف رپورٹر)اینٹی وائلنٹ کرائم سیل کے عملے نے کراچی کے علاقے گلستانِ جوہر سے 3ماہ قبل اغوا کیے گئے نوجوان کو کشمور کے کچے کے علاقے میں آپریشن کے دوران بازیاب کرا لیا۔سینئر سپرنٹنڈنٹ پولیس اے وی سی سی عبدالرحیم شیرازی کے مطابق کشمور کے کچے کے علاقے میں آپریشن کے دو ران اسپیشلائز ٹیم نے لوکل پولیس کے ہمراہ کارروائی کی ۔مغوی ذاکر اللہ کو گلستانِ جوہر سے 15 دسمبر کو اغوا کیا گیا تھا جس کے لیے غوث پور کرم پور بیگاری اور کشمور سے تاوان کے لیے فون کالز کی گئیں۔عبدالرحیم شیرازی کے مطابق اے وی سی سی نے کچے کے مختلف علاقوں میں کارروائیاں کیں اورمغوی کو غوث پور میں آپریشن کرتے ہوئے بازیاب کرا لیا گیا۔اغوا کاروں نے ذاکر اللہ کو بھاری تاوان کے لیے اغوا کرکے کچے کے علاقے میں چھپا رکھا تھا۔ کارروائی کے دوران ملزمان فرار ہونے میں کامیاب ہو گئے، مغوی کو بحفاظت کراچی منتقل کر دیا گیا ہے۔