چیف منسٹر ویمن گولڈ کپ ہاکی ٹونامنٹ کا آغاز

لاہور(سپورٹس رپورٹر) پانچواں چیف منسٹر ویمن گولڈ کپ ہاکی ٹونامنٹ نیشنل ہاکی سٹیڈیم لاہور میں شروع ہو گیا۔ ٹورنامنٹ کی افتتاحی تقریب کے مہمان خصوصی چیئرمین پی آئی اے عرفان الہی اور صدر پاکستان ہاکی فیڈریشن بریگیڈئر (ر) خالد سجاد کھوکھر تھے اس موقع پر سیکرٹری پی ایچ ایف اولمپیئن شہباز احمد سینئر بھی موجود تھے۔ ٹورنامنٹ کے افتتاحی روز پنجاب کلر، پنجاب وائٹس اور یو ڈبلیو ایچ اے نے اپنی اپنی حریف ٹیموں کو شکست دیدی۔ نیشنل ہاکی سٹیڈیم میں شروع ہونے والے چیف منسٹر پنجاب گولڈ کپ ہاکی ٹورنامنٹ میں پنجاب کلر، پنجاب وائٹس، سندھ، خیبر پی کے، بلوچستان، اسلام آباد اور یونائٹیڈ ویمن ہاکی اکیڈمی کی ٹیمیں حصہ لے رہی ہیں۔ ٹورنامنٹ کے افتتاحی روز تین میچ کھیلے گئے۔ جس میں پنجاب کلر نے خیبر پی کے کو پانچ ایک سے مات دی۔ دوسرا میچ یونائٹیڈ ویمن ہاکی اکیڈمی اور اسلام آباد ویمن ہاکی ٹیموں کے درمیان کھیلا گیا جس میں یونائٹیڈ ویمن ہاکی اکیڈمی نے چھ صفر سے کامیابی اپنے نام کی۔ تیسرا میچ پنجاب وائٹس اور سندھ کی ٹیموں کے درمیان کھیلا گیا۔ جس میں پنجاب وائٹس نے چھ صفر سے کامیابی اپنے نام کی۔