انڈر 19 ون ڈے کپ،پہلے سیمی فائنل میں کراچی وائٹس کی کامےابی

لاہور(سپورٹس رپورٹر) پی سی بی انٹر ریجن انڈر 19 ون ڈے ٹورنامنٹ کے پہلے سیمی فائنل میں کراچی وائٹس نے لاہور بلیوز کو 6 رنز سے مات دیکر فائنل کے لیے کوالیفائی کر لیا۔ پنڈی کرکٹ سٹیڈیم میں کھیلے جانے والے پہلے سیمی فائنل میچ میں کراچی ریجن وائٹس ٹیم کے کپتان نے ٹاس جیت کر پہلے بیٹنگ کا فیصلہ کیا اور مقررہ پچاس اوورز میں 7 وکٹوں کے نقصان پرو 353 رنز کا مجموعہ حاصل کیا جس میں عمیر یوسف نے شاندار سنچری سکور کی انہوں نے 135 رنز بنائے۔ دیگر کھلاڑیوں میں محمد طلحہ نے 72 اور جہانگیر سلطان نے 63 نمایاں رنز بنائے۔ لاہور بلیوز کی جانب سے باولنگ میں رضوان صدیق نے تین اور قاسم اکرام نے دو کھلاڑیوں کو آوٹ کیا۔ 354 رنز کے ہدف کے تعاقب میں لاہور بلیوز کی ٹیم مقررہ اوورز میں 9 وکٹوں کے نقصان پر 347 رنز تک ہی پہنچ پائی اور 6 رنز کے فرق سے میچ ہار گئی۔ لاہور کی جانب سے زید عالم نے 128، عزیر ناصر نے 63 اور قاسم اکرام نے 46 نمایاں رنز بنائے۔ کراچی وائٹس کی جانب سے محمد طلحہ، محمد علی خان اور محمد عثمان نے دو دو کھلاڑیوں کو آوٹ کیا۔