لاہور (نمائندہ سپورٹس +سپورٹس رپورٹر) انٹرنیشنل کرکٹ کونسل نے ورلڈ ٹیسٹ چیمپئن شپ کو دلچسپ بنانے کیلئے نئے قوانین پر غور شروع کر دیا اور رواں ماہ کرکٹ کمیٹی کے اجلاس میں نئی تجاویز پر بات ہو گی۔جو 28 اور 29 مئی کو بھارت کے شہر ممبئی میں ہو گا۔ اجلاس میں ٹیسٹ چیمپئین شپ کیلئے نئی پلئینگ کنڈیشنز پر غور کیا جائےگا۔ ورلڈ ٹیسٹ چیمپئن شپ کا آغاز ورلڈ کپ 2019 کے بعد ہو گااور 9 ٹیمیں شریک ہونگی ۔فائنل 2021 میں انگلینڈ میں کھیلا جائےگا۔ اجلاس میں ٹیسٹ چیمپئن شپ کے دوران ٹاس نہ کرانے کی تجویز زیر غور ہے، اس حوالے سے قوانین بنائیں جائیں گے جبکہ ڈے اینڈ نائٹ ٹیسٹ میچ کا فیصلہ میزبان بورڈ کرےگا۔ میچ میں استعمال ہونےوالی گیند کا انتخاب بھی مہمان ٹیم کی جانب سے کئے جانے کی تجویز ہے جبکہ پچ خراب قرار دینے کی صورت میں مہمان ٹیم کو فاتح قرار دینے کی تجویز بھی زیر غور ہے ۔ فائنل ڈرا ہونے پر لیگ میں ٹاپ ٹیم کو فاتح قرار دینے کی تجویز ہے۔