مری(نمائندہ خصوصی)مری کلڈنہ موہڑہ شریف روڈ پر مقامی لوگوں کی مدد سے لاکھوں روپے کی لکڑی گاڑی سمیت پکڑ لی گئی۔ مری کے جنگلات میں سرسبز درختوں کی کٹائی اور عمارتی لکڑی کی سمگلنگ کا دھندہ عروج پر ہے اور جنگلات کی تباہی جاری ہے مری محکمہ جنگلات کے کلڈنہ موہڑہ شریف روڈ پر مقامی لوگوں کی کوشش سے لاکھوں روپے کی لکڑی گاڑی سمیت پکڑی گئی، جبکہ زبیر نامی لکڑی کے خریدار کو پولیس نے حراست میں لے لیا۔ رینج آفیسر عبدالرحیم رفیع، بلاک آفیسر پنڈی پوائنٹ عبدالقیوم، فارسٹ گارڈ انتخاب عباسی، فارسٹ گارڈ عمران، اور عطار دستی نے موقع پر پہنچ کر مقامی لوگوں کی مدد سے زبیر ولد فاضل کو لکڑی سمیت رنگے ہاتھوں پکڑ لیا جبکہ دیگر ملزمان قریبی جنگل میں فرار ہو گئے۔ لکڑی کو گاڑی سمیت لوئر ٹوپہ ڈپو پر پہنچا کر سیل کر دیا گیا جبکہ ملزم کو تھانہ پھگواڑی پولیس کی حراست میں دے دیا گیا۔