لاہور( نمائندہ سپورٹس ) روس کی ندیزاد نے انٹرنیشنل جونیئر ٹینس چیمپیئن شپ ٹو میں خواتین سنگلز کا ٹائٹل اپنے نام کرلیا جبکہ گرلز ڈبلز کا ٹائٹل روس کی ندیزادہ اور ترکی کی مینا نے جیت لیا۔پی ٹی ایف ٹینس کمپلیکس میں کھیلے گئے خواتین سنگلز کے فائنل میں روس کی ندیزاد نے ترکی کی مینا کو شکست دی جبکہ خواتین ڈبلز کے فائنل روس کی ندیزادہ اور ترکی کی مینا نے ایران کی سفی اور جرمنی کی سارہ یگن کو شکست دے کر ٹائٹل اپنے نام کرلیا۔ گرلز سنگلز کے پہلے سیمی فائنل میں ترکی کی مینا نے چین کی ییونڈن یو کو 6-1 اور 6-3 سے جبکہ دوسرے سیمی فائنل میں روس کی ندییزادہ نے ایران کی سفی کو 6-3 اور 6-2 سے شکست دے کر فائنل کے لئے کوالیفائی کیا، گرلز ڈبلز کے پہلے سیمی فائنل میں ایران کی سفی اور جرمنی کی سارہ یگن نے ایران کی سونیا عمری اور دریا کو 6-2 اور 6-1 سے جبکہ دوسرے سیمی فائنل میں روس کی ندیزادہ اور ترکی کی مینا نے پاکستان کی زوہا عاصم اور چین کی یوینڈن یو کو 6-2 اور 6-1 سے ہرا کر فائنل میں جگہ بنا ئی۔