ڈاکوؤں کی فائرنگ ،سکول ٹیچر، رکشہ سوار 18 سالہ نوجوان جان بحق

 فیروزوالہ(نامہ نگار ) تھانہ فیروزوالا اور تھانہ فیکٹری ایریا کے علاقہ میں ڈکیتی کی واردات کرنے کی خاطر موٹر سائیکلیں نہ رکنے پر ڈاکوؤں کی فائرنگ سے سکول ٹیچرسید وقاص بخاری اور رکشہ سوار نوجوان 18 سالہ دانش شوکت جان بحق ہو گئے۔ ملزمان فرار ہو گئے بتایا گیا ہے کہ تھانہ فیروزوالہ کے علاقہ طیبہ ٹاؤن کے قریب نامعلوم ڈاکووں نے موٹرسائیکل سوار سکول ٹیچر وقاض بخاری کو روکنے کی کوشش کی نہ رکنے پر ڈاکوؤں نے فائرنگ کر دی جس کے نتیجہ میں وقاض بخاری شدید زخمی ہو گیا جسے طبی امداد کیلئے ہسپتال لایاگیا یہاں پر وہ زخموں کی تاب نہ لاتے ہوئے دم توڑ گیا۔ فیروزوالا پولیس نے مقتول کی نعش قبضہ میں لے کر پوسٹ مارٹم کیلئے ہسپتال بجوا دی مقتول 4 بچوں کا باپ بتایا گیا ہے۔ پولیس چوکی کوٹ نور شاہ کے قریب موٹرسائیکل سوارنامعلوم افراد نے رکشہ سواروں کو لوٹنے کی کوشش کی رکشہ نہ رکنے پر نامعلوم افراد نے فائرنگ کر دی جس کے نتیجہ میں رکشہ سوار نوجوان 18 سالہ دانش شوکت جان بحق ہو گیا۔ ملزمان فرار ہو گئے۔ فیکٹری ایریا پولیس نے مقدمہ درج کر لیا۔