آیل ٹینکر نے 3 موٹر سائیکل سوار روند دئیے 2 جاں بحق۔ بس اور ٹرالر میں تصادم 10زخمی

خانیوال‘ کبیروالا( نمائندہ نوائے وقت‘ نامہ نگار) تیز رفتار آئل ٹینکر نے موٹر سائیکل سواروں کو روند ڈالا،معصوم بچے سمیت 2افراد جان بحق، بس اور ٹرالر میں تصادم10 افراد زخمی ہو گئے۔تفصیل کے مطابق پٹرول سے بھرا ہوا آئل ٹینکر کبیروالا شہر سے ککڑہٹہ میں واقع پٹرول پمپ کے لئے سپلائی دینے جارہا تھا کہ کبیروالا شہر میں پرانا لاری اڈا کے قریب تجاوزات کی بھرمار ہونے کی وجہ سے ڈرائیور کا پائوں بریک کی بجائے ایکسیلٹر پر ہونے سے آئل ٹینکر تیزرفتار ہوکر بے قابو ہوگیا اور سامنے کھڑے ہوئے موٹر سائیکل پر جاچڑھا ،جس کے نتیجے میں موٹرسائیکل پر سوار 35/40سالہ محمد وسیم ولد محمد راشد علوی سکنہ 5کسی کبیروالا،8/9سالہ معصوم بچہ حمزہ ولد محمد حنیف شدید زخموں کی تاب نہ لاتے ہوئے موقع پر جان بحق ہوگیا جبکہ ان کے ہمراہ خاتون کوثر بی بی شدید زخمی ہوگئی،جو حادثے میں جان بحق ہونیوالے معصوم بچے کی والدہ ہیں۔ پولیس نے جان بحق ہونیوالوں کی نعشیں اور زخمیوں کو فوری طور پر تحصیل ہیڈکوارٹر ہسپتال کبیروالا پہنچایا اور آئل ٹینکر کو قبضہ میں لیتے ہوئے اس کے ڈرائیور کو بھی حراست میں لے لیا۔دستیاب ذرائع کے مطابق خاتون کوثر بی بی اپنے بیٹے کے ساتھ واپس اپنے گھر چاہ عطرے والاجانے کیلئے پانچ کسی کبیروالا کے رہائشی محمد وسیم علوی سے لفٹ لی ہوئی تھی،محمد وسیم علوی ایس ای میپکو خانیوال میں نائب قاصد تھا ۔ خانیوال کے علاقے کھوکھر آباد بس اور ٹرالر میں تیز رفتاری کے باعث تصادم ہوگیا جس کے نتیجہ میں 10 افراد اسد ، محمد اختر ، عبدالماجد ، عابد علی ، ثاقب ، نصرت ، محمد شاہد ، رضیہ بی بی ،محبوب ،محمد اسلم شدید زخمی ہوئے ریسکیو 1122 نے 5 افراد کو موقع پر ابتدائی طبی امداد دی جبکہ 5  زخمیوں کو ابتدائی طبی امداد کے بعد ہسپتال منتقل کردیا۔بس صاوق آباد سے فیصل آباد جارہی تھی۔