ملتان (سپورٹس ڈیسک) سابق کپتان وسیم اکرم، شاہد آفریدی اور راشد لطیف نے انگلینڈ ٹیم کے متوقع دورہ پاکستان کو مستقبل کیلئے اہم قرار دے دیا۔ وسیم اکرم نے کہا کہ انگلینڈ کرکٹ ٹیم کا مختصر دورانیہ کے لیے پاکستان کا دورہ کرنا بڑیک تھرو ہوگا،یہ سیریز نہ صرف مداحوں کے لیے دلچسپی کا سبب ہوگی بلکہ نوجوان کرکٹرز کے لیے بھی بہت حوصلہ افزائی ہو گی۔ سیریز کو یقینی بنانے کے لیے گزشتہ ایک سال سے اس پر کام ہورہا تھا، اب مثبت پیش رفت سامنے آئی ہے جو بہت خوش آئند ہے۔شاہد آفریدی کے مطابق یہ پاکستان کرکٹ کے لیے ایک زبردست قدم ہوگا،بڑی ٹیموں کا یہاں آنا بہت ضروری ہے اس سے پاکستان کا تشخص بھی بڑھے گا، امید ہے کہ ای سی بی عملی طور پر بھی آگے بڑھتے ہوئے ٹیم یہاں دورے کے لیے بھیجے گا۔سابق کپتان راشد لطیف نے کہاکہ انگلینڈ کا دورہ پاکستان بہت اہمیت رکھتا ہے۔