تنظیم مشائخ عظام اور لاثانی ویلفیئرفاؤنڈیشن کے زیر اہتمام کل ریلی نکالے گی

لاہور ( خصوصی نامہ نگار) تنظیم مشائخ عظام پاکستان اور لاثانی ویلفیئرفاؤنڈیشن ضلع لاہور کے زیر اہتمام خاتم النبیین حضرت محمد مصطفی کریمؐ کے یوم ولادت کے پرْمسرت موقع پر کل 12ربیع الاول کو الحمراء ہال مال روڈ سے لاہور پریس کلب تک’’جشن آمد رسول ؐ ریلی‘‘ نکالی جائیگی۔ ریلی کی قیادت صاحبزادہ پیر طہور احمد صدیقی نقشبندی، سید احمد ندیم شاہ،ڈاکٹر محمد الیاس قادری نقشبندی، پیر محمد راشد نقشبندی، پیر عدنان اکرم نقشبندی،پیر محمد افتخار احمد نقشبندی،  پیر رمضان نقشبندی، پیر صباح محمود، پیر عاصم نقشبندی سمیت دیگر مشائخ عظام کریں گے۔ جبکہ جشن آمد رسول ؐریلی میں لاثانی ویلفیئرفاؤنڈیشن خواتین ونگ لاہور کی صدر عارفہ افتخار، روبینہ عامر اور فاؤنڈیشن کے کمیونٹی ورکرز سمیت تمام مکاتب فکر سے وابستہ افراد کثیر تعداد میں شریک ہونگے۔جشن آمد رسول ؐ ریلی الحمراء ہال مال روڈ سے براستہ ایوان اقبال ایجرٹن روڈ سے لاہور پریس کلب پہنچے گی جہاں پر تنظیم مشائخ عظام پاکستان اور لاثانی ویلفیئرفاؤنڈیشن کے مرکزی عہدیداران شرکاء ریلی سے خطاب کرینگے ۔