شنگھائی کانفرنس پاکستان کیلئے گیم چینجر ثابت ہو گی: طاہر اشرفی

لاہور (خصوصی نامہ نگار) پاکستان علماء کونسل نے اسلام آباد میں شنگھائی تعاون تنظیم اجلاس کے کامیاب انعقاد پر صدر مملکت آصف علی زرداری، وزیر اعظم میاں شہباز شریف ، سپہ سالار قوم جنرل حافظ سید عاصم منیر، نائب وزیر اعظم اور وزیر خارجہ اسحاق ڈار کو مبارکباد دیتے ہوئے ہے کہ پاکستان کی میزبانی میں شنگھائی تعاون تنظیم کے سربراہان کا کامیاب اجلاس پوری قوم کے لیے اعزاز اور فخر ہے۔ چیئرمین پاکستان علماء کونسل حافظ محمد طاہر محمود اشرفی، علامہ عبد الحق مجاہد، مولانا نعمان حاشر، مولانا محمد شفیع قاسمی، علامہ زبیر عابد، مولانا اسد اللہ فاروق، علامہ طاہر الحسن، مولانا طاہر عقیل اعوان، مولانا ابوبکر حمید صابری، مولانا عزیز اکبر قاسمی، مولانا عبید اللہ گورمانی، مولانا محمد اسلم صدیقی اور دیگر نے کہا ہے کہ بلاشبہ یہ کانفرنس پاکستان کیلئے گیم چینجر ثابت ہوگی۔ وزیر اعظم شہباز شریف کا ایس سی او اجلاس سے خطاب حقیقت پسندانہ اور قوم کی ترجمانی ہے۔ فلسطین کے مسئلے پر جاندار موقف اختیار کرکے رکن ممالک کو اپنا کردار ادا کرنے پر زور دیا ہے۔